MANILA, Philippines - Naghain ng reklamo sa Manila Police District-General Assignment Section ang dalawang dalaga na sa halip umanong kuminis ay nasunog at nagka-butlig ang mga mukha sa Sta. Ana, Maynila. Batay sa reklamo ng dalawang biktima na itinago sa pangalang Liza, 25, ng Tondo; at Lyka, 22, ng Imus, Cavite, nadismaya sila sa kinalabasan ng derma enhancement na isinagawa ng isang “Dr. Adrales” na umano’y isang bading at may klinika sa Sagrada Familia St., Sta. Ana, Maynila. Ayon kay SPO1 Abelardo Aguilar, noong nakaraang Agosto 6, dakong alas-5:00 ng hapon nang isagawa ang nasabing beauty enhancement. Nagbayad umano si Liza ng halagang P2,956. Habang si Lyka naman ay P3,500. Sa nasabing serbisyo. Unang namula umano ang kanilang mga mukha at makalipas ang mahigit isang linggo ay tinubuan pa ng butlig-butlig kaya napilitan silang lumabas ng bahay at ireklamo ang doktor.