MANILA, Philippines - Patay ang isang 28-anyos na lalaki makaraang araruhin ng rumaragasang pampasaherong bus ang minamaneho niyang motorsiklo sa Novaliches, Quezon City kahapon.
Nakilala ang biktimang si Angel Daripan ng Caloocan City na nasawi noon din sa lugar ng insidente nang salpukin at magulungan pa ng humahagibis na Don Mariano Bus (DWZ-132) ang kanyang sinasakyang motorsiklo.
Sumuko naman ang driver ng bus na si Dexter Gadni, 28, ng Balete St., Pangarap, Caloocan City.
Base sa report, dakong alas-11:50 ng gabi kamakalawa nang maganap ang sakuna sa Quirino Highway, Novaliches Proper sa Quezon City.
Sinasabing galing sa SM Fairview ang killer bus patungo sa direksiyon ng Novaliches at habang matulin nitong tinatahak ang kahabaan ng Quirino Highway at pagsapit sa Brgy. Kaligayahan ay doon nito nasalpok ang motorsiklo ng biktima.