MANILA, Philippines - Patay ang isang helper at malubha namang nasugatan ang driver nito matapos sumalpok ang kanilang sinasakyang truck sa kahabaan ng North Luzon Expressway (NLEX), Valenzuela City kahapon ng umaga.
Dead-on-arrival sa Meycauayan Montefalco Hospital si Hospicio Arisgado, 26, matapos itong magtamo ng matinding pinsala sa ulo.
Sugatan naman ang driver nitong si Marcial Santiago, 37, ng Moriones St., Tondo, Maynila.
Dakong alas-4:00 ng umaga ng maganap ang trahedya sa kahabaan ng NLEX, Brgy. Lawang Bato, ng nabanggit na siyudad habang minamaneho ni Santiago ang isang truck (ZDL-857) nang isa pa umanong truck ang sumingit, dahilan upang iwasan ni Santiago at sa pag-iwas ay sila naman ang sumalpok sa pader dahilan sa pagkamatay ng pahinanteng si Arisgado.