MANILA, Philippines - Nasawi ang isang 17-anyos na binatilyo matapos na makuryente sa kisame ng gusali habang nagtatangkang baklasin at tangayin ang mga kable ng kuryente para sa tanso nito, kamakalawa ng tanghali sa Parañaque City.
Nakilala ang biktima na si Crisanto Sison ng #111 Manukan Extension, Manuyo 2 CAA, Las Piñas City.
Sa ulat ng Parañaque City PNP, nadiskubre ni Florante Samonte, electrician ang bangkay ni Sison matapos siyang pumasok sa Nenita Building 1 na nasa no. 8124 Dr. A. Santos, Brgy. San Dionisio.
Nabatid na napansin ni Samonte na bahagyang nakabukas ang gate at tanggal ang kandado.
Dahil sa pagdududa, agad na ininspeksyon ni Samonte ang buong gusali kung saan natagpuan ang bangkay ng biktima nang silipin ang loob ng kisame.
Nang marekober ng mga pulis, nakita pa na hawak-hawak ng biktima ang bungkos ng kawad ng kuryente na maaaring nakuryente ang binatilyo.
Kinumpirma naman ng tiyahin ng biktima na si Vilma Mendez, 38 na nangunguha ng mga kalakal na maibebenta ang kanyang pamangkin kaya posibleng tinangka niyang makuha ang mga kable upang ipagbili ang tanso.