MANILA, Philippines - Dead-on-the-spot ang isang 29-anyos na ginang nang barilin sa mukha ng hindi pa kilalang suspect sa Quiapo, Maynila, kahapon ng madaling araw.
Sa ulat ni Insp. Armand Macaraeg, hepe ng Manila Police District-Homicide Section, posibleng pinaghinalaang ‘informer’ ng pulis ang biktimang kinilalang si Maria Sangcopan, walang permanenteng tirahan at namumulot lamang ng mga plastic at basurang pakikinabangan.
Nabatid na dakong alas-2:00 ng madaling araw nang maganap ang pamamaril sa Elizondo cor. Palanca St., Quiapo, Maynila.
Tumanggi naman ang mister ng biktima ( na hindi pinangalanan) na masusi pang paimbestigahan ang insidente at isailalim sa awtopsiya ang bangkay.
Inaasahang nailibing na kahapon ng hapon sa Taguig Muslim Center ng biktima dahil sa kaugalian umano ng mga Muslim na hindi lumagpas sa 24 oras sa paglilibing ng namatay na kapatid sa Islam.
Wala umanong kagalit o posibleng kaaway ang biktima kaya nagtataka siya kung bakit ito pinatay.
Tulad din umano ng mga nakalipas na mga pagpatay sa lugar, karaniwan na binabaril sa ulo ang sinumang pinaghihinalaang police asset lalo’t ang lugar ay pugad pa rin ng mga sindikato ng iligal na droga.