MANILA, Philippines – Binawian ng buhay habang ginagamot sa Lourdes Hospital ang isang driver makalipas ang isang oras nang pagsasaksakin ito ng kanyang kapitbahay na nagalit umano sa pamimilit niyang ‘tagayan’ sa Sta. Mesa, Maynila kamakalawa ng gabi.
Saksak sa dibdib ang ikinamatay ng biktimang si Rey Bustamante, 25, ng #3535 V. Mapa Extn., Sta. Mesa, Maynila.
Agad namang isinuko ng kanyang ama ang isa sa mga itinuturong suspect na itinago sa pangalang “Koreng” habang nakatakas ang umano’y pinsan nitong si Bruce Andrew Muyot, 21.
Sa ulat ni PO1 James Lagasca, ng Manila Police District-Homicide Section, dakong alas-8:30 ng gabi nang maganap ang insidente sa kanto ng Aliw-in at Dupil Sts., Sta. Mesa, Manila.
Nauna rito, isang beer drinking contest umano ang isinasagawa sa nasabing lugar kung saan pilit umanong tinatagayan ng biktima si Bruce Andrew subalit tumanggi umano ang huli dahilan upang magkaroon ng mainitang pagtatalo. Umalis sandali si Bruce Andrew at nang bumalik ay sinaksak umano ang biktima.
Ayon sa pulisya, wala pang direktang ebidensiya na magsasangkot sa menor-de-edad na si “Koreng” maliban sa sinasabing binanggit ng biktima ang pangalan nito bago mamatay.