MANILA, Philippines - Winakasan ng isang 64-anyos na babaeng Chinese ang sariling buhay sa pamamagitan nang pagbibigti sa loob ng comfort room ng kanilang tinutuluyang condominium unit sa Tondo, Manila, kamakalawa. Nakilala ang nasawi na si Chua Pue, ng 2209 Chinatown Steel Tower, Asuncion Street, Tondo. Batay sa ulat, dakong alas-12:30 ng hapon nang matagpuan ang biktima na nakabigti sa loob ng kanilang CR. Ayon sa asawa ng nasawi na si Tiu Ling, paulit-ulit umano niyang tinatawagan ang kanyang misis sa telepono pero hindi ito sumasagot. Hindi umano ito ang ordinaryong kilos ng asawa, kaya’t nagpasya siyang umuwi ng bahay. Dito niya nadiskubre na nagbigti ang kanyang misis gamit ang kulay asul na telang isinabit sa iron grill ng bintana na nasa CR. Isinugod pa ng lalaki sa Mother and Child Hospital ang asawa ngunit patay na ito.