MANILA, Philippines – Kapwa ipinagharap ng kasong alarm and scandal ang dalawang miyembro ng Bureau of Jail Management and Penology (BJMP) na nakatalaga sa Manila City Jail matapos lumikha ng tensiyon ang kanilang pagdu-duelo sa loob ng piitan kahapon ng hapon.
Maswerteng walang natamaan o sugatan sa pagbabarilan nina Jail Officer 3 Robert Serrano at JO1 Edwin Lontoc dakong alas-2 ng hapon, sa loob ng female dormitory.
Sa inisyal na ulat ni PO3 Ireneo Sosas ng Manila Police District-Station 3. Nagkairingan ang dalawa dahil sa malakas na kalabog umano ng pintuan nang isara ni Lontoc nang may magdeliber ng mineral water kaya naasar umano si Serrano na tinadyakan naman ang nasabing pintuan.
Nasundan pa iyon ng halos magkasabay na pagbunot ng kanilang service firearms na 9mm kay Lontoc at kalibre 45 kay Serrano at nagkaputukan. Patuloy pang iniimbestigahan ang kaso.