MANILA, Philippines - Arestado ang dating pulis at kasamahan nito na kapwa miyembro ng ng Akyat-Bahay Gang matapos na maaktuhang nagnanakaw sa bahay ng isang nurse sa Quezon City kahapon ang madaling-araw.
Kalaboso ang binagsakan ng mga suspek na sina Franklin Reyes, 42, may-asawa, dating opisyal ng pulis na nasibak dahil sa kasong absent withouth leave (AWOL), at residente sa B-225, Lot 12, Phase 8, North Fairview, QC; at Raymond Hernandez, 24, ng #7 BF Homes Caloocan City.
Nakorner ang dalawa sa garahe ng bahay na kanilang pinagnakawan na si Edilfonso Manuel, 31, nursing attendant sa #5 Ilang-ilang St., Ramirez subd., North Fairview.
Ayon kay PO2 Rolando Aliguere Jr., narekober ang mga gamit tulad ng dalawang sporting cap, dalawang canon camera habang nawawala naman ang college ring (P40,000); P35,000 at $200 cash; Diamond earings P150,000; gold bracelet P80,000; gold necklace P70,000; at gold ring (P210,000).
Namataan ni SFO4 Restituto Serrano ang dalawa na pagala-gala sa loob ng bahay ng biktima kung saan inakala na pamangkin lamang ito ng may-ari, subalit nang malaman niyang wala ang huli sa bahay ay nagpasyang magtungo sa barangay para humingi ng tulong.