MANILA, Philippines - Nagdulot ng pagbabaha sa ilang mabababang lugar sa Metro Manila ang bagyong “Juan” na nagdulot ng bigat ng trapiko ngunit wala namang naitalang panganib sa buhay ng publiko.
Sa datos na nakalap ng Metropolitan Manila Development Authority (MMDA) Metrobase, hindi nadaanan kahapon ng anumang uri ng behikulo ang Marinduque St. sa Purok 2A, Lower Bicutan, Taguig City dahil sa 37-pulgadang taas ng baha habang may 10-pulgadang baha naman sa Cemetery Centennial Village sa may C-5 sa naturang lungsod.
Ang iba pang nakakaranas ng baha ay ang McArthur Highway sa Santiago, Malanday, Marikina City (7 pulgada); 11th Street, Caloocan City (13 pulgada), Pio Valenzuela patungong McArthur Highway sa Navotas (3-4 pulgada), N. Naval, Gov. Pascual, P. Garcia sa Navotas (1 talampakan), Gen. Luna St., Bgy. San Agustin I at Magsaysay St., Brgy. San Agustin, Navotas (6 pulgada).
Sinabi naman ni Marikina City spokesman, Paul Sison na umabot sa 14 na talampakan ang tubig-baha sa Tumana River. Kung aabot sa 15 metro, aakyat na ito sa “1st alert” kung saan pakikilusin na ang kanilang naka-standby na rescue units sa mga apektadong lugar upang palikasin ang mga residente.
Idinagdag nito na naging malaking tulong ang ikinabit nilang “closed circuit television (CCTV) cameras” sa mga tulay kung saan namo-monitor nila ang pag-akyat ng tubig-baha ng eksakto sa oras at agad silang nakapaghahanda.