MANILA, Philippines - Pisak ang ulo ng isang traffic enforcer ng Metropolitan Manila Development Authority (MMDA) matapos pumailalim ang minamanehong motorsiklo sa isang trailer truck kahapon na madaling araw sa Sampaloc, Maynila.
Dead-on-the-spot dahil si Rommel Maganes, nakatalaga sa EDSA -Guadalupe Makati City dahil sa pagkasagasa sa kaniyang ulo ng trailer truck na may plakang PUU-877 na minamaneho ni Alfredo Calajeno Jaime.
Sa ulat ni SPO2 Marco Saunar, ng Manila Traffic Bureau, dakong alas-12:45 ng madaling-araw nang pauwi na si Maganes sa kanilang tirahan sa Remigio St., Sta. Cruz,
Maynila sakay ng kanyang motorsiklo at kaangkas ang kapatid na si Raymund Maganes nang makabungguan ang isa ring nagmomotorsiklo sa kanto ng Legarda at Jocson St.
Dahil sa bungguan, tumilapon sa kanyang sinasakyang motorsiklo si Maganes at papatayo na sana nang bigla namang magdaan ang humahagibis na trailer truck kaya’t nahagip kaagad ang biktima na napailalim pa sa dambuhalang sasakyan.
Sumuko naman ang driver ng trailer truck na kasalukuyang nakapiit matapos sampahan ng kasong reckless imprudence resulting in homicide. Ginagamot naman sa ospital ang kapatid na si Raymund dahil sa tinamong sugat at pasa.