MANILA, Philippines - Kapwa nasawi ang mag-tiya matapos lamunin ng malakas na apoy ang kanilang tinitirhan sa sunog na naganap sa Parañaque City kahapon ng madaling-araw.
Kinilala ang mga nasawi na sina Mayleen Jubalde, at pamangkin nitong si Eman Jubalde, 16, kapwa ng 24 Michael St., Krausse Ville, Brgy. San Isidro, ng nabanggit na siyudad.
Nakaligtas naman ang kanilang kasambahay na si Isabel Fabo, matapos itong dumaan sa likurang bahagi ng bahay.
Sa report ng Parañaque City Fire Dept., naganap ang insidente pasado alas-12:05 ng madaling-araw kung saan unang kumalat ang apoy sa unang palapag ng bahay na pag-aari ni Rowena Matsukawa sa natura ring lugar.
Samantalang ang dalawang biktima naman ay natutulog sa attic ng duplex-type na may dalawang palapag sa nabanggit na lugar.
Mabilis na kumalat ang apoy at hindi na nagawang mailigtas ang mga biktima na sinasabing nakulong sa makapal na ring usok.
Dakong ala-1:40 ng madaling-araw nang matagpuan ang bangkay ng mga biktima, matapos maapula ang apoy. Inaalam pa ang sanhi ng sunog.