MANILA, Philippines - Isang 20-anyos na vendor ang nasawi makaraang mabaril matapos umawat sa nadaanang rambulan na kinasasangkutan ng kanyang pinsan sa Tondo, Maynila, kamakalawa ng gabi.
Hindi na umabot ng buhay sa Gat Andres Bonifacio Hospital ang biktimang si Noel Caseñas, 20, residente ng C-2 Capulong, Road 10, Tondo dahil sa tinamong isang tama ng bala sa likod.
Wala pang matukoy na pagkakakilanlan sa bumaril sa biktima dahil marami at hindi kilala ang gang na nakasagupa ng pinsan niyang si alyas “Nognog”.
Sa ulat ni Det. Virgilio Martinez, ang madugong insidente ay nangyari dakong alas-6:30 ng gabi, sa labas lamang ng bahay ng biktima sa kahabaan ng Capulong St. malapit sa panulukan ng Imelda St., Tondo, Manila.
Nabatid na kauuwi lamang ng biktima upang magpahinga mula maghapong pagtitinda nang makitang pinagtutulungan ang pinsan na si Nognog kaya sinikap nito na umawat.
Subalit, may isa na nakapuwesto sa kanyang likuran na bigla na lamang bumaril sa kaniya hanggang sa nagkaniya-kaniyang takbuhan na ang mga kalabang grupo.
Naiwang nakahandusay ang biktima na isinugod ng mga kapitbahay sa pagamutan pero hindi na rin naisalba ang buhay nito.