MANILA, Philippines - Dahil hindi matanggap ang pag-iwan sa kanya ng misis, isang mister ang naburyong at tinangkang sunugin ang sariling bahay at saka nagsaksak sa sarili kahapon ng umaga sa Caloocan City.
Kinilala ang suspek na si Eduardo Santos, 38, nakatira sa Road 9, GSIS Village, Brgy. Talipapa ng lungsod na ito.
Ayon sa report, alas-9 ng umaga nang makatanggap ng tawag ang pulisya mula sa mga kapitbahay ni Santos dahil sa pagwawala nito.
Dahil dito ay mabilis na rumesponde ang grupo ng SWAT at naabutan nga nila si Santos na nasa ibabaw ng bubong ng bahay at may hawak na patalim at nagsisigaw na magpapakamatay siya kapag hindi bumalik ang kanyang misis sa kanyang piling.
Tinangkang payapain ng mga pulis ang nabuburyong na si Santos, ngunit nagtangka itong magsaksak sa sarili at naagapan naman ng mga awtoridad ang gagawin nito.
Bahagyang nasugatan sa tiyan si Santos dahil sa pagsaksak nito sa sarili at mabilis itong isinugod sa President Diosdado Macapagal Memorial Center ng kanyang mga kaanak.
Ayon pa sa mga kapitbahay ng biktima, kamakalawa ng gabi ay tinangka ni Santos na sunugin ang sariling bahay ngunit agad naman itong naagapan ng mga residente ng naturang lugar. Nabatid na naburyong si Santos matapos itong iwan ng kanyang misis.