MANILA, Philippines - Isang manhunt operation ang inilunsad ng pulisya laban sa isang mister makaraang mapatay ang isang 26-anyos na fish vendor dahil lamang sa sagian ng kani-kanilang mga banyera sa Navotas City.
Kinilala ang nagtatagong suspek na si Jose Arota-Imfanso, may sapat na gulang, nakatira sa Cattleya St., Agora, NBBS, ng nabanggit na siyudad.
Samantala, nakakulong naman ang anak nitong si Jomar, 26, ng nabanggit na lugar matapos itong madakip ng pulisya sa isang follow-up operation.
Ang biktima ay nakilalang si Emil M. Gastilo, 26, na nasawi matapos itong pagtulungang saksakin ng ice-pick at bugbugin ng mag-amang suspek.
Sa imbestigasyon ng pulisya, naganap ang insidente noong Mayo 4, dakong alas-12 ng madaling-araw sa Royal Consignation, na matatagpuan sa Market-1, Fish Complex ng nabanggit na siyudad.