MANILA, Philippines - Pisak ang murang katawan ng isang 3-anyos na paslit nang maatrasan at magulungan ng nagmamaniobrang jeep sa Malabon City kamakalawa.
Dead-on-the-spot sanhi ng pinsala sa ulo at katawan si Francene Daniel Nogales, ng Bagong Lote, Potrero ng lungsod na ito.
Nakatakas naman ang hindi pa nakikilalang driver ng pampasaherong jeep, na may plakang DAR-894.
Base sa report ng pulisya, naganap ang insidente dakong alas-5 ng hapon habang nakatayo ang biktima malapit sa kanilang bahay at hindi nito napansin ng nagmamaniobrang suspek. Naatrasan at nagulungan ang biktima na naging dahilan ng agad na kamatayan.
Nang malaman ng driver ang nangyari ay kumaripas na ito ng takbo at iniwan ang pampasaherong jeep na minamaneho.