MANILA, Philippines - Babae ang naging mitsa ng buhay ng isang 37-anyos na lalaki na napatay sa saksak ng dating kinakasama ng kaniyang live-in partner, nang mag-krus ang kanilang landas, sa Tondo, Maynila, kahapon ng madaling-araw.
Nakilala ang nasawing biktima na si Reynaldo Ocampo, ng CM Recto Ave., Binondo, Maynila dahil sa tinamong mga saksak sa katawan.
Tinutugis naman ang suspek na si Manuel Viscanio, alyas “Palos”, ng Tahimik St., Tondo, Maynila na tumakas matapos ang insidente.
Naganap ang insidente dakong alas-4:45 ng madaling-araw malapit sa Del Pan Sport Complex sa Del Pan St., Tondo.
Nabatid na umalis ng kanilang bahay ang biktima upang iwasang lumala ang pakikipagtalo sa kinakasamang si Rosita Naval, 39, subalit sa paglalakad nito sa sa kalye ay nagkataong nakasalubong ang suspek at walang sabi-sabing pinagsasaksak umano ito. Matapos iyon ay nagpunta pa umano ang suspek kay Naval, habang may hawak umanong kutsilyo upang sabihan ito na patay na ang biktima.
Bukod rito, sinabi ng imbestigador na una nang pinagtangkaan ng suspek ang biktima noong Pebrero dahil umano sa ginawang panunulot ng nasawi sa dating kinakasama ng suspect.