MANILA, Philippines - Hindi na mahihirapang maghanap ng gagastusin ang mga magulang ng mga graduating students ngayong taon matapos sagutin ni Caloocan City Mayor Enrico “Recom” Echiverri ang togang gaga mitin ng mga magsisipagtapos sa mga pampublikong paaralan ng lungsod.
Ayon kay Echiverri, nararapat lamang na tulungan ng lokal na pamahalaan ang mga pamilyang nahihirapang makakuha ng gagastusin sa pang-arkila ng togang gagamitin ng kanilang mga anak na magsisipagtapos ngayon taon.
Aniya, lahat ng magsisipagtapos ngayon taon sa mga pampublikong paaralan sa elementarya man o sekondarya ay aakuin na ng lokal na pamahalaan ang gagamiting toga ng mga graduating students.
Sinabi pa ng alkalde, responsibilidad ng lokal na pamahalaan na ibigay ang mga pangangailangan ng mga residenteng hindi sapat ang kinikita para sa kanilang pamilya kaya’t bilang tugon dito ay naisipan ni Echiverri na ilibre ang togang gagamitin ng mga magsisipagtapos na estudiyante. (Lordeth Bonilla)