MANILA, Philippines - Naaresto ng mga elemento ng Quezon City Police ang isang abogado at isa pa makaraang mahulihan ang mga ito ng mga nakaw na cellphone na nagkakahalaga ng mahigit sa isang milyong piso sa loob ng isang van sa nabanggit na lungsod.
Sa report na nakarating kay Quezon City Police District (QCPD) director Chief Supt. Elmo San Diego, dakong alas-12:30 ng hapon nang matagpuan ang naturang van sa kanto ng Quezon Avenue at Scout Chuatoco, Quezon City.
Sinasabing nang ma-recover ng mga pulis ang naturang van ay kasabay namang nadakip ang may dala umano nito na isang Atty. Ronald Aguado na nagpakilalang tauhan ng Presidential Anti-Smuggling Group (PASG) at isang Anthony Palmos, habang nakatakas ang iba pang kasamahan ng mga ito. (Angie dela Cruz)