MANILA, Philippines - Nabigla ang may 400 kawani ng Philippine Drug Enforcement Agency (PDEA) matapos isagawa ang sorpresang drug testing sa flag raising sa kanilang tanggapan sa Quezon City kahapon ng umaga.
Ayon kay Derreck Carreon, public information officer ng PDEA, dahil itinuring ang ahensya na isa sa tagapagpatupad ng batas laban sa droga kailangan ang mismong ahensya lalo na ang mga tauhan dito ay hindi nababahiran ng anumang may kinalaman sa bawal na droga.
Nabatid na alas-8 ng umaga nang pigilan ni PDEA director Senior Undersecretary Dionisio R. Santiago ang lahat ng kawani at mga ahente nito na umalis sa kanilang hanay makaraan ang flag raising ceremony para sa surpresang drug testing.
Sinasabing ang drug testing ay ginawa bunga ng pagkakadakip ng otoridad sa isang prison guard ng PDEA na sangkot sa droga.
Ngunit ayon kay Carreon, walang kinalaman ang nasabing isyu sa drug testing dahil ginagawa nila ito tatlong beses sa isang taon, upang hindi pagdudahan ng mga mamamayan ang kanilang integridad.
Malalaman ang resulta ng drug testing sa loob ng 24-oras kung saan ang magiging positibo ay bibigyan ng kaukulang aksyon. (Ricky Tulipat)