MANILA, Philippines - Isang 17-anyos na binatilyo ang sinaksak ng kanyang kaibigan matapos mabatid ng huli na nakokunsensiya at susuko na ito sa mga awtoridad para isiwalat ang ginawa nilang pagpatay, kahapon ng umaga sa Malabon City.
Ginagamot sa Tondo Medical Center sanhi ng saksak ng icepick sa kaliwang dibdib ang biktimang si Billy Martinez, ng Sacristia St., San Agustin ng lungsod na ito.
Kinilala naman ang nadakip na suspek na si Christopher Lalim, 24, at kalugar ng biktima.
Sa imbestigasyon ng pulisya, naganap ang insidente dakong alas-6 ng umaga sa kahabaan ng C. Arellano st., ng nabanggit na lugar, nang salubungin ng suspek ng saksak ang kaibigang biktima.
Nagalit ang suspek matapos na malaman nito na magsusumbong na sa mga pulis ang biktima tungkol sa ginawa nilang krimen, ang pagpaslang sa isang Walter Yepes, 20, ng Pitong Gatang Sipac, Navotas City, kamakalawa dakong alas- 5:00 ng umaga.
Lumalabas na nakunsensiya na si Martinez at handa na itong sumuko at ikanta kung sino pa ang kanyang kasabwat sa krimen na nalaman naman ni Lalim kung kaya tinangka nitong patahimikin ang kaibigan sa pamamagitan nang pagsaksak dito, pero hindi siya nagtagumpay. Ngayon, nadagdagan pa ang kaso ni Lalim dahil na rin sa tangkang pagpatay kay Martinez. (Lordeth Bonilla)