MANILA, Philippines - Paglalamayan na rin matapos na makipaglamay sa burol ng kanyang kapitbahay ang isang pedicab driver makaraang saksakin ng isang dating kaalitan, kamakalawa ng gabi sa Tondo, Maynila.
Namatay habang ginagamot sa Tondo General Hospital ang biktimang si Renato Mapili, 45, ng San Sebastian St., Tondo.
Tinutugis naman ang suspek na kinilala lamang sa alyas “Itik” na tumakas matapos ang isinagawang krimen.
Sa ulat ni Det. Jonathan Bautista ng Manila Police District-Homicide Section, dakong alas-9 ng gabi nang maganap ang insidente sa may Osmeña St., Tondo.
Nabatid na nagsusugal ang biktima sa burol ng isang kapitbahay nang mamataan umano ng suspek at nilapitan ito habang nakatalikod at patraydor na binurdahan ng saksak sa iba’t ibang bahagi ng katawan.
Agad ding tumakas ang suspek habang ang biktima ay isinugod ng mga kapitbahay sa nasabing ospital.
Patuloy pa rin ang isinasagawang imbestigasyon sa insidente. (Ludy Bermudo)