MANILA, Philippines - Nadakma ng isang pulis Maynila ang isa sa dalawang karnaper na naaktuhan niyang tinatangay ang kaniyang motorsiklo, na nakaparada sa Sampaloc, Maynila, kahapon ng madaling-araw.
Nakapiit na sa Manila Police District-General Assignment Section (MPD-GAS) ang suspek na si John Henson, 33, residente ng Aguilar St., Binondo, Maynila at miyembro ng Bahala na Gang nang bitbitin siya ng biktimang si PO2 Jupiter Tajonera.
Kinilala naman ang nakatakas nitong kasamahan na si Ricardo Austria, alyas “Boy Nognog”, ng Kusang Loob St., cor Tayuman St., Sta Cruz, Maynila.
Nabatid na ginising ang pulis ng sekyu na si Allan Porras dahil sa pagpindot ng busina ng dalawang suspek sa kaniyang nakaparadang motorsiklo sa parking lot, malapit sa kaniyang bahay sa 1015 P. Noval St., Sampaloc, Maynila, dakong alas-4:30 ng madaling-araw.
Agad namang pinuntahan ng pulis ang kanyang motorsiklo at doon nga naabutan niya pang magka-angkas na ang mga suspek sa kaniyang motor kaya hinablot niya ito at nahulog ang naka-angkas na si Henson na kanyang naaresto, habang tuluyang nakatakas si Austria. (Ludy Bermudo)