MANILA, Philippines - Nasawi ang isang 17-anyos na binatilyo habang tatlo pa ang nasugatan habang ipinuprusisyon ang replica ng Black Nazarene sa Tondo, Maynila, kamakalawa ng gabi.
Namatay habang ginagamot sa Mary Johnston Hospital ang biktimang si Kevin Solomon, ng 118 Sta Fe St., Sambayanan sa Rawis Bldg., 1 Unit 309 Tondo bunga ng tama ng bala sa likod.
Nilalapatan din ng lunas sa nasabing ospital si Jaysan Mendoza, 24, estudyante, ng 1542 Interior 1 Panday Pira Extn., Tondo, Maynila, habang ang dalawa pa umanong sugatan ay isinugod sa hindi nabatid na ospital matapos tamaan ng ligaw na bala na tumagos mula sa katawan ni Solomon.
Hindi pa matukoy ang pagkakakilanlan sa suspek na armado ng improvised shotgun na tumakas matapos ang pamamaril.
Ayon sa pulisya, dakong alas- 8:00 ng gabi nang maganap ang pamamaril sa kanto ng Panday Pira at Lacson Sts., Tondo.
Nabatid na ang mga biktima ay kasama sa prusisyun nang sumulpot ang armadong suspek at walang sabi-sabing binaril si Solomon sa likod na tumagos sa dibdib nito.
Dahil sa paglagos ng bala sa dibdib ni Solomon ay nadamay ang tatlong biktima ng tumagos na bala.
Blanko pa ang pulisya kung ano ang posiblentg motibo sa isinagawang pa mamaril. (Ludy Bermudo)