MANILA, Philippines - Sa halip na tow truck ang manghila ng mga sasakyang nakabalagbag sa kalye, ang mismong tow truck ang hinihinalang nahila naman ng karnaper habang nakaparada sa Tondo, Maynila, sa ulat kahapon.
Ito ay nabatid sa pagdulog sa tanggapan ng Manila Police District (MPD)-Anti Carnapping Unit (MPD-ACU) ng biktimang si Robert Peñaflorida, 31, driver ng Smartfixx ng Ibero Towing Company.
Dakong alas-6:30 ng umaga nang nadiskubre ni Penaflorida na nawawala na ang minamaneho nitong tow truck (PDT 190) habang nakaparada sa kanto ng Juan Luna at Gagalangin, Tondo.
Aniya, magrereport pa lamang siya sa duty nang madiskubre na wala na ang ipinarada niyang tow truck.
Sa isa pang kaso, isang Jowell Quijano ng 419 Moriones St., San Nicolas Tondo, ang naghain ng reklamo hinggil sa pagkawala rin ng kanyang ipinaradang kulay silver na Mitsubishi Estrada pick-up BLS 4x4 (ZHM-266) malapit sa kanyang tahanan.
Nasa 10 minuto pa lamang umano nitong ipinaparada ang kanyang sasakyan sa Plaza Moriones, San Nicolas, Tondo nang natuklasan nitong nawawala. (Ludy Bermudo)