MANILA, Philippines - Patay ang isang National Bureau of Investi gation (NBI) agent nang pagbabarilin at pagsasaksakin ng tatlong holdaper sa holdapang naganap sa isang pampasaherong dyip, sa Tondo, Maynila, kamakalawa ng gabi.
Nakilala ang nasawing biktima na si Special Investigator III Gil Yanesa, nakatalaga sa NBI-Anti Kidnapping, Hijacking and Armed Robber Division (NBI-AKHARD), 40,residente ng Gabriel Bldg. Zaragosa st. Tondo, Maynila.
Dead-on-arrival sa Gat Andres Bonifacio Hospital ang biktima dahil sa tinamong bala at mga saksak sa katawan at dibdib.
Hawak na ng NBI ang mga suspek na sina Ronel Restugese, 27, isang Joel Azarcon at isang alias “Pepeng” matapos na maaresto sa isinagawang follow-up operation.
Dakong alas-8 ng gabi nang maganap ang insidente sa loob ng isang pampasaherong jeepney habang binabagtas ang kahabaan ng Road 10, malapit sa Lakandula St., Tondo.
Sakay ang biktima sa jeep (NXB 746) na may rutang Quiapo-Divisioria-North Harbor nang pagsapit sa nasabing lugar nang nagdeklara ng holdap ang mga suspek na nagpanggap na mga pasahero.
Umalma umano ang biktima at tinangka nitong manlaban dahilan upang magkagulo sa loob ng pampasaherong jeepney at magbabaan ang mga pasahero habang pinagtulungan naman ang biktima ng 3 suspek.
Nang bumagsak na ang biktima ay nagkaniya-kaniyang takbo papatakas ang mga suspek habang ang mga nakasaksi ang nagsugod sa pagamutan sa biktima. (Ludy Bermudo)