MANILA, Philippines - Dalawang 10-anyos na batang lalaki ang kapwa nasawi makaraang malunod sa lagoon sa loob ng isang golf course na kanilang pinasok, kamakalawa ng gabi sa Pasay City.
Kapwa wala nang buhay nang maiahon sa lagoon ng Villamor AirBase Golf Course sina Benjie Nuelan at Charles Maravillo, kapwa grade 4 pupils at naninirahan sa Sitio Una, Gate 3, Brgy. Bicutan, Fort Bonifacio,Taguig City.
Sa ulat ni PO3 Ronaldo David, ng Pasay police, dakong alas-7:30 ng gabi nang maiahon sa lagoon ng golf course ang dalawang biktima. Nabatid na palihim na pumasok ang mga biktima kasama ang 13-anyos na si Resmond Daqule sa maliit na butas sa pader ng golf course upang mamulot ng mga nagkalat na golf balls na kanilang ibinebenta.
Unang nadulas si Nuelan na agad na kumapit kay Maravillo ngunit nahatak din pababa sa may 10 talampakan na lalim na tubig sa naturang lagoon.
Agad namang humingi ng tulong si Daqule sa mga obrero sa naturang lugar ngunit kapwa wala nang buhay ang dalawang bata nang dumating sila sa lagoon.
Nagsasagawa naman ng imbestigasyon ang pulisya kung nagkaroon ng posibleng kapabayaan ang golf course sa insidente dahil sa naturang siwang sa kanilang pader.