MANILA, Philippines - Hinihinalang dahil lamang sa inggitan sa kinikita sa pangongolekta ng basura, napatay sa saksak ang isang 48-anyos na basurero ng mga kabaro nito sa Tondo, Maynila, kahapon ng umaga. Hindi na umabot ng buhay sa Tondo General Hospital ang biktimang si Ronaldo Curbano, ng 71 Jacinto St., Tondo, Maynila dahil sa tinamong mga sugat sa katawan. Tinutugis pa ang dalawang suspek na hindi pa alam ang pagkilanlan. Ayon sa ulat, dakong alas-4:15 ng umaga nang maganap ang insidente sa kanto ng Vitas at Jacinto Sts., Tondo. Ikinakarga umano ng biktima ang mga nakolekta niyang basura nang lapitan ng mga suspek at walang sabi-sabing pinagsasaksak ito. Mabilis namang dinala sa ospital ang biktima ng kanyang kapatid pero hindi na umabot nang buhay. (Ludy Bermudo)