MANILA, Philippines - Bumagsak sa kamay ng pulisya ang isang miyembro ng Bukas Kotse gang matapos itong maaktuhan sa loob ng isang sasakyan na kanyang ninanakawan, sa lungsod Quezon.
Hindi na nagawang makapalag ng suspek na si Melvin Gayago, 19, binata ng Tulip St., Roxas District sa lungsod nang dakpin ng mga awtoridad sa loob mismo ng Ford Everest na pag-aari ni Ramino Santos, 53, government employee at resident sa Narciso St., Roxas district dito.
Ayon sa pulisya, nangyari ang insidente pasado alas-6:30 ng gabi sa may Tulip St., Roxas makaraang iparada ng biktima ang kanyang sasakyan at magpunta sa bahay ng kaibigan.
Matapos na iwan ng biktima ang sasakyan, sinamantala ito ng suspek at sinimulang pagnakawan.
Tiyempo namang nagpapatrulya ang mga barangay tanod sa lugar at naispatan ang suspek kung saan agad itong inaresto. Nasamsam sa suspek ang mga gamit na kinulimbat sa biktima. (Ricky Tulipat)