MANILA, Philippines - Sugatan ang isang pulis at kasama nito makaraang paulanan ng bala ng baril ng dalawang armadong suspek lulan sa motorsiklo, kamakalawa ng gabi .
Kinilala ang mga biktima na sina PO3 Christopher Henry Vargas, 39, nakatalaga sa Maritime Group ng PNP at kalugar nito na si Jovy Abenir, 33.
Ang dalawa ay kapwa nagtamo ng mga tama ng bala sa katawan at ginagamot sa hiwalay na pagamutan.
Base sa imbestigasyon, ganap na alas-8 ng gabi nang paulanan ng bala ng mga suspek ang mga biktima habang nakatayo at nagkukuwentuhan sa may Feria Road sa nasabing lugar.
Ayon sa mga nakasaksi sa insidente, bigla na lamang sumulpot ang motorsiklo ng mga suspek at walang sabi-sabing pinagbabaril ang nabiglang sina PO3 Vargas at Abenir.
Makaraan ang pamamaril, mabilis na tumakas ang mga suspect. Inaalam pa ang motibo sa insidente. (Angie dela Cruz)