MANILA, PHilippines - Dalawa sa tatlong miyembro ng riding-in- tandem gang ang napatay sa pakikipagbarilan sa rumespondeng mga pulis ilang minuto makaraang holdapin ng mga suspek ang isang hardware sa Brgy. Talipapa sa Quezon City kahapon ng hapon.
Sa pamamagitan ng driver’s lisence, tinukoy ang isa sa mga nasawing suspek na si Maximo Aquino Jr., 39, at residente sa #4087 Que Grande St., Brgy. Ugong Valenzuela City. Ang isa pang kasama nito ay natukoy lamang sa tatoo nitong “Diablo 7”, “Rosa” at “Bong D” sa kaliwang braso.
Ayon kay Supt. Alex Sintin, hepe ng Police Station 3, isa pa sa mga suspek ang tinutugis nila na siyang may dala ng perang nakuha sa Mclain Hardware.
Sinabi pa ni Sintin na ang mga suspek ang responsable sa serye ng panghoholdap sa mga maliliit na negosyante sa kahabaan ng Mindanao Avenue at Tandang Sora sa naturang lungsod.
Nauna rito, hinoldap ng mga suspek na sakay sa magkahiwalay na motorsiklo ang naturang hardware saka tumakas tangay ang hindi mabatid na halaga ng salapi.
Naialarma agad sa pulisya ang pangyayari kaya nagawang habulin ang mga suspek pero nakipagbarilan ang mga ito hanggang sa mapatay ang dalawa sa mga holdaper. (Ricky Tulipat)