MANILA, Philippines - Nakulong ang isang British national matapos mabigong mabayaran ang kanyang hotel bills na umabot sa P40,000 sa Ermita, Maynila, kamakalawa ng hapon.
Nahaharap pa sa kasong estafa sa City Prosecutor’s Office ang suspek na si Chris Tomas, pansamantalang nanunuluyan sa Best Western Hotel-La Corona sa 1166 M.H. Del Pilar St., Ermita dahil sa reklamo ng kinatawan ng hotel na si Michael Dela Cruz.
Sinasabing nag-check-in ang suspek sa nasabing hotel noong Agosto 10 at nagbigay ng down payment na P4,600.
Subalit umabot na nang halos 20 araw ang di nababayaran ng dayuhan kaya kinausap ito upang singilin sa nakonsumong pagkain at patuloy na paggamit ng hotel amenities pero tumanggi pa rin itong magbayad.
Nang ipa-aresto sa pulisya, umamin ang dayuhan na wala siyang pera at ang kaibigan lamang nito ang nagbigay sa kaniya ng pang-downpayment. (Ludy Bermudo)