MANILA, Philippines - Isang dating pulis ang napatay habang nadakip ang kasamahan nitong Chinese national makaraang makipagbarilan sila sa mga kagawad ng Philippine Drug Enforcement Agency na umaaresto sa kanila sa isang drug raid operation sa kanilang lungga sa lungsod ng Makati kahapon ng umaga.
Kinilala ni PDEA Director General Senior Undersecretary Dionisio R. Santiago ang nasawi na si Nataniel Capitamia, dating may ranggong Police Senior Inspector, 31, at naninirahan sa D-2, 825 Addjustown Homes, Bacoor, Cavite.
Arestado naman ang kasamahan nitong si Hao Ching Chang, alyas Go Ang, Nilo Lim, 31, nanunuluyan sa Unit 3812 Joya Condominium Rockwell, Makati City.
Sinasabing si Capitamia ay naalis sa pagkapulis dahil sa kasong AWOL at dati nang nasangkot sa kasong hulidap at iba pang kaso tulad ng droga.
Ang dayuhang Tsinoy na marunong magsalita ng tagalog ay sinasabing sangkot sa malawakang pagbebenta ng droga.
Sa ulat ng PDEA, nangyari ang insidente sa may unit na tinutuluyan ng Tsinoy makaraang lusubin ito ng tropa ng Complaint Reaction Unit sa pamumuno ni Chief Insp. Val Lopez para ilatag ang search warrant laban sa una pasado alas 8 ng umaga.
Ayon kay Lopez, pagbukas ng pintuan, biglang bumungad sa kanila si Capitamia at sinimulang paputukan ang kanilang tropa sanhi upang gumanti sila ng putok.
Nakumpiska sa lugar ang isang kilo ng shabu at iba pang droga na nakaproseso pa at isang kalibre .45 baril.