MANILA, Philippines - Nabulabog ang mga residente ng Brgy. Socorro sa Cubao, Quezon City nang muntik nang masunog ang kanilang kabahayan makaraang sabuyan ng isang galong gasolina ng isang hindi nakikilalang lalake ang isang mamahaling kotse na pag-aari umano ng isang doktor dito kahapon ng madaling-araw.
Ayon kay Mon Casala ng Brgy Socoro, dahil sa nilikhang malaking apoy, tuluyan nang nasunog ang isang Honda Civic model 1997 ng doktor na si Richard Santos.
Tinitingnan ng mga awtoridad ang kaso ng arson dahil isang basyong galon na gasolina ang natagpuan sa naturang lugar matapos maapula ang apoy.
Ayon kay Casala, nangyari ang insidente ganap na alas-12 ng ma daling-araw sa may harap ng tahanan ng biktima sa #17 10th Avenue, Brgy. Socorro.
Hinihinala ng mga awtoridad na posibleng may matinding galit ang suspek sa biktima. (Ricky Tulipat)