MANILA, Philippines – Sobrang kalasingan at walang tulog sa loob ng 12 oras dagdag pa ang labis na selos sa hinalang may kinalolokohang iba ang misis ang nagtulak sa isang driver para ihostage sa pamamagitan ng kutsilyo ang kanyang asawa sa lungsod ng Quezon kahapon ng umaga.
Sa unang negosasyon na ginawa ng mga barangay opisyal, hindi bumibigay sa pagkakahawak ang suspek na si Romy Castillo, 35, habang nakatutok ang Rambo-type na kutsilyo sa leeg ng kanyang asawang si Sally sa loob ng kanilang tinutuluyan sa may 4th floor, MRV Bldg., 11 Pilot Drive, Brgy. Commonwealth, Q.C.
Maging ang mga kaanak at kaibigan ng suspek ay nakiusap na rin kay Castillo para sumuko, ngunit nagmatigas ito kung kaya tumagal ang pakikipagnegosasyon hanggang sa gamitin na rin ng awtoridad ang tatlo nitong mga anak, para bumigay ito.
Makalipas ang halos tatlong oras na negosasyon, pasado alas-9:45 ng umaga ay tuluyang nanlambot si Castillo at kusang inalis ang pagkakatutok ng kutsilyo sa kanyang asawa saka sumuko sa mga awtoridad.
Ayon kay Supt. Constante Agpaoa, hepe ng Station 6 ng QCPD, labis na selos ang nagtulak kay Castillo upang ihostage nito ang kanyang asawang si Sally dakong alas-6:30 ng umaga.
Kuwento ng isang barangay opisyal sa lugar, bago ang insidente nakipag-inuman umano si Castillo sa ilang kasamahan kung saan habang nag-iinuman ay nagawi ang kuwentuhan sa biruan patungkol sa asawa nitong nagugustuhan umano ng ibang driver.
Dahil nasa impluwensya na ng alak madaling napaniwala ang suspek, dahilan upang magdamag itong uminom ng alak at umuwi sa kanilang bahay kinaumagahan.
Sa kanilang bahay, kinompronta ni Romy ang asawang si Sally kaugnay dito dahilan upang magkaroon ang mga ito ng mainitang pagtatalo at sa tindi ng pagka-praning ay kumuha ng patalim saka hinostage ng una ang huli.