MANILA, Philippines - Iimbestigahan ng National Bureau of Investigation (NBI) kung sino ang “anonymous sender” na nagpadala sa pamamagitan ng email ng sex video nina Dra. Hyden Kho at aktres na si Katrina Halili sa sinalakay nilang website na natukoy na unang nag-upload nito sa internet.
Ito ay kasunod nang ginawang pagsalakay kamakalawa ng hapon ng mga ahente ng NBI sa isang bahay sa Cavite na sinasabing nagsisilbing tanggapan ng website na inisyal na nag-upload ng Hayden-Katrina sex video.
Sa nasabing pagsalakay ay naaresto din ng NBI ang mag-aamang maintainer ng website na “fleshasiadaily.com,” na kinilalang sina Fidel Lazarte at mga anak na sina Jobert at Marvin.
Nabatid na dakong alas-3 ng hapon kamakalawa nang salakayin ng mga operatiba ng NBI-Anti-Fraud and Computer Crimes Division (AFCCD) ang nasabing tahanan na matatagpuan sa Block 89, Topaz St., Zapote Dos, Bacoor, Cavite.
Ayon sa NBI, inamin umano ni Jobert na sa kanila ang website na nag-upload ng video subalit itinanggi nito na ang sex video ni Kho at Katrina at iba pang mga babae ang kanilang ini-upload kundi ang video lamang na nagsasayaw ang dalawa sa tugtog ng “careles whisper”.
Ipinadala umano sa kanila sa pamamagitan ng email ng hindi nagpakilalang sender ang video ng dalawa na nagsasayaw.
Sinabi ni AFCCD chief Assistant Regional Director (ARD)Vicente de Guzman III, na una munang nagsagawa sila ng technical surveillance kaya natukoy ang kinaroroonan ng website na fleshasiadaily.com, na naglathala ng Careless Whisper, Beautiful Girl at Maricar Reyes.
Ayon kay Head Agent Palmer Mallari, executive officer ng grupo, natuklasan nila na may parukyanong umaabot sa isang milyon katao kada-araw ang nasabing website kayat posibleng sampahan umano nila ng kasong pornography ang tatlo dahil pinagkakakitaan nila ito kada araw.
Nilinaw pa nito na maaari ding maging testigo ang mag-ama kung makikipagtulungan sa isinasagawang imbestigasyon ng NBI at maging testigo din sa paghabol sa source ng naturang sex video. (Gemma Amargo-Garcia)