MANILA, Philippines – Isang 6-na buwang buntis ang inaresto ng pulisya makaraang maak tuhang nagbebenta ng rugby sa mga adik na parukyano at batang lansangan, sa Binondo, Maynila, kamakalawa ng gabi.
Nakilala ang suspect na si Nonilyn Lacsina, 19, ng C.M. Recto Ave., Binondo, Manila.
Ayon sa ulat, dakong alas-11:00 ng gabi nang arestuhin ang suspek sa kanto ng CM Recto Ave., at Elcano St., Binondo. Nabatid na nakatanggap ng ‘tip’ ang pulisya tungkol sa garapalan o lantarang pagbebenta ng rugby ng suspect sa mga kabataan sa lugar na tinaguriang solvent boys.
Ayon sa suspek, may tatlong buwan pa lamang niyang ginawang hanapbuhay ang iligal na pagbebenta ng rugby. Nabatid na namumuhunan lamang ng P150 sa bawat litro ng rugby at inililipat sa maliliit na botelya para sa retail na P15 ang isa.
May ‘promo offer’ pa umano ang suspek na buntis dahil sa kada dalawang botelyang bibilhin ay P20-lamang ang benta niya sa parukyano.
Hindi bababa sa 20 botelya ang benta sa kada araw ng suspek. (Ludy Bermudo)