MANILA, Philippines - Isang American national ang nabiktima ng mga hinihinalang miyembro ng kilabot na “Ativan Gang” kung saan nakuha mula dito ang mga credit cards kamakalawa ng hapon sa Malate Maynila.
Personal na dumulog sa Manila Police District (MPD)-General Assignment Section (GAS) ang biktimang si William Nicholas Meyer, 23, pansamantalang nanunuluyan sa Pension Natividad, Malate, Maynila upang ireklamo ang suspek na nakilala lamang nito sa alyas na “Alberto”.
Sa reklamo ng biktima, dakong alas-4 ng hapon nang maganap ang insidente sa loob ng bar and restaurant ng pension house na tinutuluyan ng biktima. Mag-isa lamang umanong umiinom ng alak ang biktima nang bigla na lamang lumapit sa kanya ang suspek at makipag- kaibigan.
Kaagad namang nagtiwala ang biktima sa suspek dahil sa tamis ng mga salita nito at nagkayayaan ang mga ito na mag-inuman. Ilang minuto lamang ang lumipas ay nakaramdam umano ng pagkahilo ang biktima at bigla na lamang umano siyang nakatulog. Pagkagising ng biktima ay wala na ang suspek sa kanyang harapan kaya’t tumuloy na siya sa kanyang kwarto ngunit nang pagkakita umano nito sa kanyang wallet ay wala na ang kanyang tatlong magkakaibang credit cards. (Gemma Amargo-Garcia)