MANILA, Philippines - Bigo na sa panghoholdap ay nabigo pang makatakas ang dalawang estudyante umano ng Philippine Maritime Institute Colleges na tumalon pa sa Pasig River nang habulin ng pulis at taumbayan, kahapon ng madaling araw sa Ermita, Maynila.
Bukod sa kasong attempted robbery, sinampahan din ng reklamong frustrated homicide ang mga suspek na sina John Warren Lumahan, 20, residente ng #1 Salamat st., Zone 1, Signal Village, Taguig City at Ernesto Gotido, 22, ng Burke Bldg., Sta. Cruz, Maynila.
Inireklamo sila ng pananaksak sa biktimang si Benjamin Pelonio, 30, isang taxi driver na hinoldap nila sa may Liwasang Bonifacio sa naturang lunsod.
Sinubukan ng driver na agawin ang patalim ng mga suspek pero siya ang nasaksak ng mga ito.
Nang lapitan ng ilang usisero ang taxi na nasa komosyon ay mabilis na tumakbo ang dalawang suspek at agad namang rumesponde ang mga pulis na nakatalaga sa MPD-Station 5-Plaza Lawton.
Tumalon pa sa Ilog Pasig ang dalawa upang hindi maabutan ni PO3 Melchor Cariño at taumbayan subalit iniahon sila sa Ilog at binitbit sa presinto. (Ludy Bermudo)