MANILA, Philippines - Sugatan ang isang babae nang hagisan ng granada ng hindi pa nakikilalang lalaki ang car showroom ng Hyundai dahilan upang magkabasag-basag ang salamin nito, kamakalawa ng gabi sa Global City, Fort Bonifacio, Taguig City.
Batay sa ulat, dakong alas-7:15 ng gabi nang bulabugin nang napakalakas na pagsabog ang katahimikan sa labas ng Hyundai Global City Hub na matatagpuan sa 5th Avenue corner 28th St., nabanggit na lungsod.
Bunga nito, tinamaan ng shrapnels sa kaliwang binti ang bystander na si Jane Pansoy, 22, housemaid, ng 22 F., One Mckinley Place ng The Fort, Taguig City.
Nadamay naman ang right front side passenger window ng Toyota Vios na may plakang ZMY-282 na minamaneho ni Amelita Alba, 25 ng 31 Catleya St. Valle Verde II, Pasig City.
Napag-alaman kay Sr. Supt. Camilo Cascolan, hepe ng Taguig Police na posibleng M20 fragmentation granade ang inihagis ng suspect sa harapan ng car showroom o ‘casa’ ng Hyundai, base na rin sa mga nakuhang pira-pirasong bakal at safety pin sa pinangyarihan ng insidente.Tumanggi namang magbigay ng pahayag ang isa sa may-ari ng Hyundai kung may kaugnayan sa negosyo ang motibo nang pagpapasabog.
Tiniyak naman ng pulisya na makatutulong sa kanilang imbestigasyon ang close circuit television na nasa labas ng casa kung saan nakita dito ang isang lalaki na umaaligid bago narinig ang malakas na pagsabog bago tumakas lulan ng isang motorsiklo. (Rose Tamayo-Tesoro)