MANILA, Philippines - Tuluyan nang sinibak sa puwesto ang hepe ng Quezon City Police District-Anti Carnapping Unit habang nagsasagawa ng imbestigasyon sa kontrobersyal na “shootout o rubout” sa tatlong hinihinalang carjackers sa EDSA nitong nakaraang Martes ng gabi.
Ipinag-utos ni Sr. Supt. Elmo San Diego, deputy district director for administration, ang pagtanggal sa puwesto kay Insp. Angelo Nicolas habang patuloy ang kanilang imbestigasyon.
Una nang inilagay sa “confine to limits status” at dinisarmahan sina SPO1 Frederick Torres at PO3 Randy Barrameda na siyang mga itinuturong walang habas na namaril sa mga biktima kahit nakahandusay na ang mga ito.
Sa panayam naman ng PSN, sinabi ni Nicolas na susundin niya ang kautusan ng kanyang mga pinuno dahil sa bahagi lamang ito ng proseso.
Naniniwala naman ito na maaabsuwelto siya sa anumang pananagutan sa naturang insidente dahil sa ginampanan lamang nila ang kanilang tungkulin.
Nasa proseso naman ang QCPD fact finding team na makakuha ng kopya ng “video footage” ng ABS-CBN upang magamit sa imbestigasyon habang hinihintay pa rin ang resulta ng pagsusuri ng Scene of the Crime Operatives (SOCO) sa mga ebidensyang nakalap sa “crime scene”.
Iginiit naman ni San Diego na may naganap talagang engkuwentro sa pagitan ng mga suspek at ng pulisya kung saan dinidetermina lamang kung may sobrang paggamit ng puwersa ang huli.
Nanawagan rin naman ito sa Commission on Human Rights na igalang rin naman ang karapatang pantao ng mga pulis.