MANILA, Philippines - Patay ang isang 49-anyos na dalaga nang aksidenteng mabundol at pumailalim sa isang pampasaherong bus habang ang una ay tumatawid kahapon ng tanghali sa lungsod Caloocan .
Kinilala ang nasawing biktima na si Elizabeth Sarmiento, ng Calle Uno ng nabanggit na lungsod.
Kusa namang sumuko at nahaharap sa kasong reckless imprudence resulting to homicide ang driver na si Jeruselle Nuestro, 36, ng Santo Cristo, Angat, Bulacan.
Sa imbestigasyon ng pulisya naganap ang insidente dakong alas-12:30 ng tanghali sa kaha baan ng Gen. San Miguel Street, Barangay Sangandaan, ng nasabing lungsod.
Nabatid na tumatawid ang biktima sa naturang lugar at hindi namalayan ang rumaragasang Sta. Rita Bus Lines na minamaneho ni Nuestro kung saan agad na nabundol ito.
Pumailalim pa ang katawan ng biktima sa bus at nagulungan pa ang magkabilang hita nito ng kanang hulihang gulong dahilan upang halos maghiwalay ang katawan ng biktima. (Lordeth Bonilla)