Isang sanggol na tinatayang may pitong araw na gulang ang edad ang itinapon sa karagatan ng Manila Bay at natagpuan kamakalawa ng hapon.
Dakong alas-4 ng hapon nang madiskubre ang bangkay ng sanggol na lalaki na nakalutang sa dalampasigan ng Roxas Blvd. malapit sa Grand Boulevard Hotel, Malate sa Maynila.
Nabatid kay Junjun Garcia, 30, vendor, napansin niya ang nakalutang sa tabing dalampasigan at nang tingnan ay isang sanggol.
Bukod pa rito, isa pang fetus ang nakita ring nakalutang sa Pasig River sa bahagi ng Paco, Maynila kamakalawa ng hapon.
Nasa lima hanggang anim na buwang gulang ang edad ng fetus na nakasilid sa plastic na nakalutang sa bahagi ng Cristobal st., Paco dakong alas-7 ng umaga. (Ludy Bermudo)