Isang pulis ang nasawi matapos itong barilin ng kanyang kabaro kamakalawa ng gabi sa Caloocan City.
Patay na nang idating sa Martinez Memorial Hospital ang biktimang si P03 Enrique Trinidad, 36, nakatalaga sa Caloocan City Police Station, Detective Management Branch at residente ng E. Castillo St., Lerma, Maypajo ng nabanggit na lungsod. Nagtamo ito ng mga tama ng bala ng baril sa dibdib at sentido buhat sa kalibre .9mm.
Samantala, tumakas naman ang suspek na nakilalang si P03 Hector dela Cruz, nakatalaga sa Northern Police District Office (NPDO).
Sa report na natanggap ni Police Supt. William S. Macavinta, hepe ng Caloocan City Police, naganap ang insidente dakong alas-6:40 ng gabi sa kahabaan ng E. Castillo St., Lerma, Maypajo ng nabanggit na siyudad.
Nabatid na pinaparada ng biktima ang kanyang motorsiklo sa harapan ng kanilang bahay nang lapitan ito ng suspect at ilang sandali pa ay nagkaroon ng mainitang pagtatalo sa pagitan ng dalawang parak sa hindi pa malamang dahilan. Dito na umano binunot ng suspek ang kanyang baril at walang sabi-sabi nitong pinaputukan ang biktima. Matapos ang pamamaril ay mabilis na tumakas ang suspect.
Sa ngayon ay patuloy pang iniimbestigahan ang nasabing insidente.