Kritikal ang isang binata nang tusukin ng icepick ng kanyang kapitbahay na nairita matapos na hindi nabigyan ng pang-toma ng una, kamakalawa ng gabi sa Navotas.
Nakilala ang biktima na si Wilson Galit, 35, ng Duhat St., Pitong Gatang, Sipac ng nabanggit na lungsod. Pinaghahanap naman ng pulisya ang suspect na si Oscar Monzano na kalugar ng biktima.
Batay sa ulat ng pulisya, dakong alas-10 ng gabi nang unang harangin ng suspect ang biktima sa Duhat St., at hiningan ng pang-inom.
Hindi naman nagbigay ang biktima at sa pagtalikod nito ay tinusok ito ni Monzano ng icepick bago tumakas. (Rose Tamayo-Tesoro)