Isang 33 anyos na sweeper ang namatay nang aksidenteng tamaan sa dibdib ng bala nang pumutok ang ipinatong sa mesa na service firearm ng isang guwardiya sa loob ng security office ng Manila Zoo, sa Malate, Maynila kamakalawa ng hapon.
Hindi na umabot ng buhay sa Ospital ng Maynila ang biktimang si Alfredo Delos Reyes, alyas “Hapon,” binata, ng #374 Matiisin St., Tondo, Maynila.
Boluntaryong sumuko sa pulisya ang suspek na si Ricardo Generoso, 33, may asawa, ng Manila Security Force at nakatalaga sa Manila Zoo.
Nagkukuwentuhan pa umano sina Delos Reyes, Generoso at karelyebo nitong guwardiya na si Ombao Romo sa loob ng security office nang alisin ng suspek sa holster nito at ipatong sa lamesa ang kalibre .38 baril upang i-turn over.
Hind akalain ni Generoso na puputok ang baril na umano’y aksidenteng tumama sa biktima. (Ludy Bermudo)