Hinoldap ng tatlong hindi nakikilalang lalaki ang isang sales agent ng Bayad Center habang ang una ay naglalakad upang magdeposito sa bangko ng halagang tinatayang mahigit sa P.6 million kamakalawa ng hapon sa Valenzuela City. Ayon sa biktimang si Brian Comandao, 32, sales agent ng Bayad Center ng BBB Branch, dakong alas-3:45 ng hapon habang naglalakad siya sa A. Fernando St., Brgy. Marulas ng nabanggit na lungsod upang ideposito sa Banco de Oro ang collection na P678,000 nang tabihan siya ng puting taxi na may plakang TWP-708 at sakay dito ang mga suspek. Isa sa mga suspek ang agad na bumaba at tinutukan siya ng baril bago sapilitan isinakay sa taxi at mabilis na pinasibad. Habang tumatakbo ang taxi ay kinuha ng mga suspek ang dalang pera ng biktima, wallet, relo at cell phone bago ito ibinaba sa Arty Subdivision, Brgy. Marulas habang mabilis namang tumakas ang mga suspect. (Lordeth Bonilla)