Nagbabala kahapon sa publiko ang Quezon City Police District (QCPD) na mag-ingat sa gumagalang mga holdaper na dinudukutan muna ang kanilang bibiktimahin at saka lilimasan ng mga ari-arian sa loob ng isang SUV (sports utility vehicle) van.
Ito’y matapos na mabiktima ng bagong modus ng mga holdaper ang 28-anyos na si Dennis Bustamante, ng Brgy. Holy Spirit, ng naturang lung sod pasado alas-9 kamakalawa ng gabi.
Sa salaysay ng biktima, naglalakad siya pauwi ng kanyang bahay nang biglang hintuan siya ng isang dirty white na Toyota Revo na hindi niya naplakahan. Dito lumabas ang apat na lalaki na armado ng baril at sapilitan siyang kinaladkad papasok sa naturang sasakyan.
Sa loob nito, nilimas ng mga suspek ang kanyang pera na nagkakahalaga ng P6,000 at cellphone. Masuwerte naman na pinakawalan din ng mga salarin ang biktima na pinagbantaan muna na papatayin kapag lumikha ng gulo at humingi ng saklolo. Mabilis na tumakas ang mga suspek. (Danilo Garcia)