Malubhang nasugatan kahapon ng madaling-araw ang isang 33-anyos na lalaki makaraang masaksak nang makialam sa pagtatalo ng kaibigan nitong waiter at isang kustomer sa loob ng isang bar, sa Quezon City. Nasa ligtas na namang kalagayan sa East Avenue Medical Center ang biktimang si Jerome Mendoza, ng Brgy. South Triangle, ng naturang lungsod.
Naganap ang insidente dakong alas-3:10 ng madaling araw sa loob ng Daungan Restaurant Bar sa Panay Avenue ng naturang lungsod. Nabatid na nakialam umano ang biktima sa nagaganap na pagtatalo ng kaibigan nitong waiter ng naturang bar sa isang hindi nakilalang kustomer. Dito nagalit ang suspek na kostumer na naglabas ng patalim at pinagsasaksak si Mendoza. Mabilis namang tumakas ang suspek matapos ang kanyang pananaksak habang isinugod ng mga tauhan ng bar ang biktima sa pagamutan. (Danilo Garcia)