Dalawa katao ang namatay nang resbakan at pagbabarilin ng may apat na hindi nakikilalang armadong kalalakihan na pinaniniwalaang kanilang nakaaway sa Quezon City.
Idineklarang dead on arrival sa East Avenue Medical Center (EAMC) sanhi ng tinamong mga tama ng bala ng baril sa iba’t ibang parte ng katawan ang mga biktimang sina Rommel Malate, 20; at RJ Barbosa, 19, kapwa residente ng San Gabriel St., Brgy. Batasan Hills, QC.
Inaalam pa ng pulisya kung sino ang may-ari ng isang light blue na Toyota Revo na sinakyan ng mga suspek sa pagtakas matapos ang krimen. Hindi naman muna ibinunyag ng pulis ya ang plaka ng sasakyan upang mabigyang daan ang pagsasagawa ng imbestigasyon.
Sa pagsisiyasat ng Quezon City Police District-Criminal Investigation and Detection Unit (QCPD-CIDU), dakong alas -10 kamakalawa ng gabi nang maganap ang insidente sa San Gabriel St. , Brgy. Batasan Hills, Quezon City. Bago rito, nag-tetext pa umano ang dalawang biktima nang biglang dumating ang mga suspek.
Sa hindi pa malamang dahilan, bigla na lamang bumaba ang mga suspek sa kanilang sasakyan bago pinagbabaril sina Malate at Barbosa at saka agad tumakas ang mga suspek.
Hindi pa mabatid ng pulisya kung ano ang motibo sa naturang krimen, gayunman malaki ang kanilang paniwala na posibleng niresbakan ang mga ito ng kanilang nakaaway. (Angie dela Cruz)